Umsóknir í Kennaraháskóla Íslands

Nú er alveg að koma að lokadagsetningu móttöku umsókna í KHÍ.   5. júní nk. rennur út sá tími sem stúdentar og aðrir áhugasamir hafa til að skila inn umsóknum í grunnnám.  Vefurinn er ekki alveg nógu spennandi verð ég að viðurkenna, en ég hvet umsækjendur til að hringja á skrifstofu skólans og fá upplýsingar um námsleiðirnar.

Ég vil hvetja alla sem eru að hugsa um að sækja um nám í einhverjum háskóla að kynna sér námið við KHÍ.   Það er nýbúið að breyta verulega kennslunámskrá skólans þannig að valið hefur aukist og með því fylgir ný hugsun um kennaranám og framtíðarnámsmöguleika kennara. 

Ég bendi sérstaklega á nýtt kennaranám fyrir yngstu börnin.   KHÍ mun eflast mikið spái ég í kennslufræði fyrir yngstu börnin á næstu árum enda eru rannsóknir alltaf að sýna okkur meira og meira fram á mikilvægi þessa fyrstu ára barna okkar varðandi tengslamyndun, máltöku og námshæfni.   Það eru margar spennandi rannsóknir til um þroska barna og ekki er síður skemmtilegt að nota hugvitið til að hugsa hvernig eigi að rannsaka þessu litlu kríli okkar til að fá fram hvernig þau hugsa og læra.

Einn prófessorinn minn í Seattle er sé ég ennþá á fullu að rannsaka getu þeirra yngstu.  Áhugasamir geta skoðað af heimasíðu hans ýmsar nýjar birtingar og umfjallanir um þær.

Athugasemdir

[Salvör Kristjana Gissurardóttir, 4.6.2007 kl. 11:32]

Ég er sammála því að það góða starf sem er unnið í Kennaraháskóla Íslands er ekki nógu sýnilegt á vefnum. Það eru mörg spennandi verkefni sem bæði starfsfólk og nemendur vinna þar að og eftir því sem ég hef heyrt frá nemendum þá eru þeir mjög ánægðir með námið þar og námsandann. 

Ég held að fyrir nemendur þá sé mjög gott að  sjá dæmi um viðfangsefni sem nemendur eru að vinna að og hafa sýnishorn af námsefni og námsumhverfi á vefnum.