Af hverju Ingibjörg frekar en Jón?

Reykjavíkurbréf Morgunblaðsins hefur verið til umræðu í dag.   Þar eru settar fram kenningar um að Ingibjörg Sólrún gæti auðveldlega slitið stjórnarsamstarfi eftir tvö ár og búið til minnihlutastjórn.  Að mínu mati er þetta ótrúleg fullyrðing um Ingibjörgu umfram aðra flokksformenn.  Hefði Jón eitthvað verið traustari til samstarfsins með mjög lítinn meirihluta og jafnvel betri kjötkatla í boði með vinstri stjórn?  Ég hefði nú viljað sjá sterkari rökstuðning á Mogganum gegn samstarfi Sjálfstæðisflokks og Samfylkingarinnar.

Hins vegar get ég alveg tekið undir ýmsar vangaveltur um hvernig er allt í einu að vinna með fólki í Samfylkingunni nú þegar allt stefnir í sterka ríkisstjórn þessara tveggja flokka.  Ég að minnsta kosti finn að það er pínu skrýtið að heilsa þessu annars ágæta fólki (stjórnmálamenn í öllum flokkum eru að mínu mati hið mætasta fólk) sem samherja.   Þetta er án efa skrýtið fyrir alla í báðum flokkum og mun taka smá tíma að venjast.   Þetta er spurning um að byggja upp nýja samskiptahætti og traust. 

En nú bíð ég eins og aðrir frétta um nýja ríkisstjórn og stjórnarsáttmála.  Nú þarf að fara að byrja og láta hendur standa fram úr ermum.

Athugasemdir

[Sigfús Þ. Sigmundsson, 20.5.2007 kl. 23:46]

Held að Styrmir sé endanlega að tapa sér í samsærisfrumskóginum.  Skil ekki alveg hvað eigendur Moggans eru að spá með því að koma honum ekki á eftirlaun....

[Gunnar Jóhannsson, 21.5.2007 kl. 09:54]

Er þetta ekki sett svona fram vegna þeirrar staðreyndar að Samfylkingin er jú yfirlýstur höfuðandstæðingur Sjálfstæðisflokksins?  Það er ekki hægt að segja það sama um Framsókn enda hafa þeir verið mjög léttir í taumi síðastliðin 12 ár.  Þannig hefði þessi fullyrðing í morgunblaðinu ekki getað átt við Jón Sig.

Það er engu líkara en að sumir Sjálfstæðismenn séu búnir að gleyma allri beiskjunni og hatrinu af hálfu sumra Samfylkingarmanna í sinn garð. 

[Örn Jónasson (IP-tala skráð) 21.5.2007 kl. 10:56]

Sammála þér, þetta er skrýtið ástarsamband hjá þeim Geir og Ingibjörgu (eða verður þetta svona ástar-haturssamband?).

Án efa finnst mörgum í mínum flokki (Sjálfstæðis) að flokkurinn sé að færast til vinstri (kannski of mikið að sumra mati), og án efa er álíka komið hjá mörgu Samfylkingarfólki, sem finnst að þeirra flokkur sé að færast of mikið til hægri.

Án efa verður þetta góð stjórn, hún verður a.m.k. mjög sterk.  Það verður spennandi að sjá hvað kemur út úr þessu, þ.e. hvort einhverjir flokkadrættir munu koma upp innan Sjálfstæðisflokksins milli hægri og vinstri arms, og hvort svipað ástand muni koma upp hjá Samfylkingunni.

[Bjarni Kjartansson, 21.5.2007 kl. 12:34]

Ég þekki Jón allvel, traustur og gengnheill maður.  Ætti að vísu miklu frekar vera í okkar ástsæla flokki en í Framsókn. 

Við stóðum ekki við kjörorðin okkar ,,Gjör rétt, þol ei órétt" þegar aðilar í þingflokki okkar voru í viðræðum við Samfylkinguna á sama tíma og formaður okkar var í viðræðum við Jón um stöðuna.

Ég treysti ekki ISG neitt viðlíka og Jóni.  Við höfum verið í félagskap saman og þar hefur Jón getið sér afar gott orð, sem heill og sannur maður.

Kærar kveðjur

Miðbæjaríhaldið