Ný ríkisstjórn fæðist

Þetta var spennandi dagur í dag fyrir stjórnmálaáhugamenn og stjórnmálamenn.  Ég er í útlöndum núna og viðurkenni að ég var mikið að senda sms og kíkja á vefinn.  Nú liggur þetta ljóst fyrir og mér líst við fyrstu sýn vel á útdeilingu embætta.  Enn á hins vegar eftir að sjá hvernig nefndir þingsins skiptast sem að mínu mati fá of litla athygli og umræðu.  Aðalmálið er svo samningur nýrrar ríkisstjórnar um málefni sem verður kynntur á morgun.

Ég er sérstaklega ánægð fyrir hönd Þorgerðar Katrínar sem ég veit að hafði mikinn áhuga og metnað til að halda áfram í ráðuneyti menntamála.  Hún hefur oftar en ekki sagt að menntamálaráðuneytið sé mikilvægasta fagráðuneytið og ég er auðvitað sammála því.  Ég hefði viljað sjá fleiri konur í ráðherrastóla hjá mínum flokki og ég veit að Geir hefði viljað það sama.  Hins vegar er erfitt að ganga fram hjá efstu mönnum á lista flokksins eftir að prófkjör hafa farið fram.  Það má heldur ekki gleyma því að við missum eitt ráðuneyti frá okkur m.v. fráfarandi ríkisstjórn og kveðjum Sturla Böðvarsson sem hefur verið einstaklaga sterkur stjórnamálamaður og samgönguráðherra.

Mér líst vel á ráðherra Samfylkingarinnar.  Ég sakna að sjá ekki Ágúst Ólaf á ráðherralistanum, hann hefði vafalaust orðið öflugur viðskiptaráðherra fyrir flokkinn.  Ég vona að tími hans muni koma eins og tími Jóhönnu kom í dag.

Athugasemdir

[Heimir Lárusson Fjeldsted, 23.5.2007 kl. 15:41]

Sé á eftir Sturlu með trega.

Jóhanna á eftir að sýna og sanna að þar fer stjórnmálamaður með næman skilning á þörfum og löngunum fólks sem hefur lent undir í lífinu.

Það sýndi hún í Viðeyjarstjórninni og á eftir að gera á ný.

Geir virðist mjög hæfur forsætisráðherra og á eflaust eftir að marka djúp spor í íslenska stjórnmálasögu.

[Kjartan Vídó, 26.5.2007 kl. 09:10]

Elskan Sturla var lélegur ráðherra og hið besta mál að losna við kauða